linuxawy

Question = 2 ( B || !B )

Ideas.. I've seen people kill in the name of them... and die defending them. We are told to remember the idea, not the man. Because a man can fail. He can be caught, he can be killed and forgotten. But several years later... his idea can still change the world.
و عدى يوم الاضراب
خلص اليوم وعدى بصورة هادية فى اسكندرية زى ما كنت متوقع.. اسكندرية لسه ما اتشحنتش كفاية علشان تدخل فى مصادمات عنيفة مع الحكومة، حصلت مظاهرات طبعا فى مكان المظاهرات المقدس – المنشية.. وسمعت عن حبة اعتقالات لكن يمكن مش للدرجة الكبيرة زى القاهرة أو المحلة.

النهاردة رحت الشغل.. يمكن ديه كانت حاجة غريبة للى يعرفنى كويس، انا عموما ما بافوتش حاجة جماعية زى ديه، وكنت بادعوا الناس للاضراب.. مش عارف ايه اللى حصل، لكن انا رحت الصبح علشان امشى الحاجات المهمة لان طبيعة عملى فيها حاجات مستعجلة كتير، وعلشان انسق اليوم مع فريق الادمينز اللى انا الليدر بتاعه وبعدين أمشى على طول.. دخلت فى اجتماعات كتير وما قدرتش أمشى قبل الساعة 3. لكن ديه كانت فرصة كويسة ليا انى اقعد على الانترنت واقرا حاجات كتير وأتابع اليوم فى باقى المناطق. وبرضة فرصة كويسة انى اجرب شوارع اسكندرية وهى فاضية.. فعلا البلد كانت فاضية أكتر مما كنت متوقع.. كنت فرحان ان الشعب وقف وقفة رجالة والعربيات راكنه عند البيوت والشوارع فاضية.. صعبوا عليا الناس اللى عايزين يروحوا مشاوير ومش لاقيين تاكسى أو اى حاجة توصلهم. اللى معايا فى الشغل قالوا ان علشان ياخدوا تاكسى لحتة ما تجيش 2 كيلو استنوا ساعة تقريبا على ما عرفوا يركبوا. حتى طوابير العيش.. تخيلوا؟ العيش ما فيش عليه طوابير.. فعلا ابتديت اهدا من جوايا واحس ان الهم اللى احنا شايلينه للبلد ديه جايب همه، وأكتر مما نتوقع لكن ما نقدرش اننا نعرف نتايج اللى احنا بنعمله غير لما النتايج نفسها تقرر انها تظهر.

اليوم كان بيعدى وانا جوايا مشاعر كتير... فرحان بالمواطن العادى اللى استجاب.. زعلان على الناس اللى بتتبهدل فى القاهرة.. غضبان على نظام مش قادر حتى يتعامل مع الاضراب صح.. وقلبى محروق على المحلة وأهلها. وفوق كل ده زعلان.. من ايه؟ فعلا مش عارف.
يمكن زعلان من نفسى؟ علشان ما شاركتش فعلا فى الاضراب زى ما كنت عايز؟ يمكن زعلان من الوضع اللى وصلناله؟ يمكن متلخبط مش قادر أحدد الصح فين والغلط فين؟
الأكيد انى كنت قلقان.. قلقان جدا من اللى حيحصل.. انا عارف ان ديه شرارة، يا تقدر تولع النار يا حنحاول نولع شرارة تانية بمجهود أعلى – انا باقول احنا وانا قصدى على الشعب ده .. على الشارع المصرى .. على المواطن البسيط اللى عايش فينا كلنا من جوانا.
القلق كان من انى مش عارف ايه الأحسن.. هل ان تكون ديه النار اللى بننفخ فيها؟ ولا تكون شرارة تقوم وتنام بسرعة؟

كملت اليوم.. وبصراحة قلقى زاد..

زاد لما اتفرجت على الفضائيات.. تجاهل تام من الجزيرة.. العالم تذكر أخبار بسيطة فى شريط الأخبار.. البى بى سى تنشر بعض الأخبار. وطبعا القنوات الحكومية
بتستهبل وتقول ما فيش حاجة حصلت.

كل ده كوم والحاجة اللى كانت زى القلم على وشى كوم تانى.. قناة الحرة الأمريكية اللى هدفها معلن جدا: غزو ثقافى... القناة ديه لقيت فيها تغطية كبيرة جدا وتشجيع عالى للناس اللى عملت الاضراب.

يا الله... الناس دول أكبر عدو لينا.. وهم اللى بيشجعونا؟؟؟ احنا اللى ضربنا الحجرين ببعض وطلعنا الشرارة ولا هم؟ يا ترى الحجرين دول جم منين؟ يا ترى النار اللى حتتطلع ديه حتحرق مين وفين ولمصلحة مين؟

فين الصح؟ نظام كل همه نفسه على مصلحته ولو على حسابنا؟ ولا ثورة عارمة حتاخد ناس كتير فى الرجلين؟؟؟ مش عارف لكن قبل ما اضرب الحجرين ببعض تانى وأنفخ فى النار لازم أفكر كويس.. لو قامت الثورة الشعبية.. ايه حجم الضعف اللى حنكون فيه؟ مين حيكسب فى مجال السياسة الخارجية؟ مين اللى حيستفيد؟ اكيد اللى بيشجعنا ده حيستفيد ... لكن.. احنا فين؟

نفسى... تكون ايفوليوشن مش ريفوليوشن... تفتكروا ممكن؟

Post new comment

The content of this field is kept private and will not be shown publicly.
CAPTCHA
This question is for testing whether you are a human visitor and to prevent automated spam submissions.
ten plus ten equals
Solve this math question and enter the solution with digits. E.g. for "two plus four = ?" enter "6".
Delicious Bookmarks