linuxawy

Question = 2 ( B || !B )

Ideas.. I've seen people kill in the name of them... and die defending them. We are told to remember the idea, not the man. Because a man can fail. He can be caught, he can be killed and forgotten. But several years later... his idea can still change the world.
عن "يسقط يسقط ابن تيمية"

واحد من أصدقائى لقيته عامللى تاج على صورة فيها تغريدة لصديقى علاء عبد الفتاح. التغريدة بيقول فيها 4 كلمات "يسقط يسقط ابن تيمية". اللطيف برضه انى لما شفت اللينك الأصلى للصور لقيت صديقى ده كاتب تعليق هناك "مفيش كﻻم محترم ممكن يتقال على ابو .....الي بيتطاول على علماء الأمة". المشكلة الحقيقية ان صديقى ده من القليلين جدا اللى لسه ما وقعوش تماما فى فخ الاستقطاب، ودايما بيقول عن نفسه انه بيحاول يكون فى وسط الوسط ردا على تصنيفى لنفسى انى يسار الوسط. المهم ان الكلام ده سببلى حزن شديد، اذا كان ده رأيه يبقى الباقى بيفكر ازاى.

المهم انى بدل ما ادخل فى حوار طويل معاه، قررت اكتب الكلام ده يمكن حد غيره يكون محتاج يسمعه. حاتكلم عن 3 حاجات، التغريدة ومعناها، رد الفعل عليها، واللى كاتبها. حاحاول اخلى كلامى منطقى وفى نقط بسيطة علشان المنطق بيكون هو اللغة المشتركة بين اللى بيفكروا من جميع الاتجاهات.

التغريدة:

"يسقط يسقط ابن تيمية"

  • التغريدة دعابة - فى رأيى بايخة - واضحة، ورد على الهتاف بتاع "يسقط يسقط كارل ماركس" اللى اتقال فى فيديو طلع مؤخرا على الانترنت، وكان كل الناس بتقلش عليه وقت التغريدة ديه. اللى كان متابع التايم لاين فى تويتر حيقدر يأكد النقطة ديه.
  • لما قلنا "يسقط يسقط حسنى مبارك" كنا بنتكلم عن شخص ماسك سلطة عايزينه يسقط من السلطة ديه، ماحدش حيقول دلوقتى "يسقط السادات" مثلا، وبعد الثورة ما حدش بيقول "يسقط حسنى مبارك" لأن الكلام ده مالوش معنى. لما حد يقول يسقط على شخص ميت، يبقى الشخص ده يا بيهزر هزار بايخ يا اما مش فاهم حاجه. اسقط الكلام ده على تويتة علاء وعلى الهتاف الحماسى اللى كان بيتقال فى الفيديو.
  • النداء بالسقوط من الحكم - بفرض عدم عبثيته - مش تطاول على الشخص. ابن تيمية عالم له احترامه لكن مقامه مش اعلى من الخلفاء الراشدين مثلا. ما تنساش ان عثمان بن عفان منع الولاة من انهم يأذوا اللى بينادوا بسقوطه. والموضوع ده حصل بعد كده فى التاريخ الاسلامى. اللى بينادى بسقوط شخص وما اتكلمش عليه كلام غير حقيقى - ده برضه بغض النظر عن ان علاء ما اتكلمش علي شخصه أو اراؤه أصلا - يبقى ما تطاولش.


رد الفعل:

  • رد الفعل مبالغ فى عبثيته مع انه مش رد فعل قوى ولم يتم تحويل الموضوع لحملة - حتى الان -. نشر الصورة على أساس انها دليل لأن الشخص ده ضد الدين يدل على ان اللى ناشرها أصلا مش عارف لو واحد ضد الدين حيعمل ايه. بالراحة كده انا لو عايز أشكك فى الدين الاسلامى حاقول يسقط ابن تيمية؟ فعلا؟ الفراغ ممكن يوصل حد لكده؟ فيه حد حيصدق ان ابن تيمية وحش لو قلت يسقط؟
  • مع نشر الصورة ديه، تم توزيع شتايم طلعها امن الدولة فى حملات تشويه ضد علاء من أيام كفاية فى 2004 / 2005. زى اتهامه بالشذوذ مثلا، والالحاد، وغيره. أصلا اللى بيتكلموا دول ما يعرفوش حاجه عنه غالبا غير من الاشاعات اللى سمعوها، وكفى المرء كذبا أن يحدث بكل ما سمع.
  • المؤلم - والمقلق فى نفس الوقت - ان الناس اللى شيروا ما فكروش. هما شافوا حد بيتكلم عن ابن تيمية فالموضوع اتقلب لتطاول على علماء الأمة وشتايم زى "ابن ال ....". هل ده أصلا تطاول؟ طب بلاش، لو كان التطاول المفترض ده كان عن ابن حزم مثلا - وده عالم محترم برضه بس السلفيين ما بيتماشوش مع اراؤه - كان رد الفعل حيكون برضه كده؟ طب لو كان اللى كاتبها مش علاء؟ الموضوع غيرة على علماء الاسلام ولا حمية الجاهلية دفاعا عن اللى انت مؤمن بيه بس أو هجوما على عدو سياسى ليك؟


علاء عبد الفتاح:

الكلام اللى حاكتبه هنا بناء على معرفة شخصية لعلاء وعائلته. لو انت شخص ما تعرفنيش شخصيا أو ما تثقش فى قدرتى على الحكم على الناس ما تكملش قراية.

  • علاء صديق ليا من سنين طويلة، حوالى 8 أو 9 سنين. باختصار اكتر من قبل ما ربنا يهدينى - نسبيا يعنى - وأتدين شوية. وفضل صديق ليا لحد النهارده وما عتقدش ان ده حيتغير قريب. صديق هنا يعنى واحد بيدخل بيتى وبادخل بيته، يعنى واحد لما باكون فى القاهرة بابات عنده فى البيت والعكس هو بات عندى لما كان فى اسكندرية. مراته تعرف مراتى. حضرتله مناسبات عائلية زى سبوع ابنه خالد. لما كان فى السجن ومراته ولدت زرتها مع مجموعة من الأصدقاء. يعنى اعرفه كويس.
  • من الحاجات اللى بهرتنى فى علاء من ساعة ما عرفته هو انه متجوز من قبل ما يتخرج. هو ومنال ما بيفترقوش - ربنا يخليهم لبعض. احيانا كتير قبل ما اتجوز كنت باسأل نفسى اذا كنت حاقدر احافظ على الحب اللى بينى وبين مراتى زى علاء ومنال. هو متجوز من قبل ما اعرفه بفترة. علاء ومنال من الحاجات اللى شجعتهم على انهم يجيبوا أولاد بعد تنحى مبارك انهم شافوا انى قدرت ان يكون عندى ابنى وفى نفس الوقت مش منعزل عن الدنيا وناشط فى كثير من المجالات.
    أنا ليه باقول كده؟ علشان أى حد يقول انه شاذ يتنيل على عينه ويفكر ويشغل البتاع اللى جوه جمجمته شويه.
  • ماقدرش أصنفه انه شخص متدين، لكن على مدى السنوات الأخيرة انا ماشفتوش ضد التدين. يعنى من الاخر علاء مش هو اللى بيحارب الدين، وان كان عنده اراء قد تكون غير السائدة لكن عمره ما حاول يفرض اراؤه الدينية على حد، على حسب ما شفت.
  • علاء مؤمن ببعض الحريات من الناحية السياسية، زى مثلا موضوع خانة الدين اللى رافضها فى البطاقة ومعبر عن ده بانه كاتب فى الفيسبوك بتاعه كلمة N/A فى خانة الديانة (وديه معناها ان الخانة غير مطابقة، كان ممكن يكتب  athiest لو ملحد مثلا). ناس كتير بتمسك النقط ديه وبتقول ده كافر. مع اختلافى معاه فى الرأى بخصوص خانة الديانة لكن مش معنى كده انى أكفره.
  • علاء بيعمل مجهود فوق العادى فى حاجات كتير غير خلافية. يعنى مثلا علاء هو اللى ابتدا مجموعة مستخدمين اللينوكس فى مصر - وانا شخصيا عرفت اللينوكس على ايد شخص اتعلم على ايد علاء -. عمل ورش عمل لمعالجة اللغة العربية برمجيا وطلعت حاجات فرقت مع افراد وشركات كتير (متاحة تحت رخصة البرمجيات الحرة). وحاجات تانيه كتير. وافضل شىء انه ما بيتكلمش عن انجازاته، مجرد بيعمل اللى هو شايفه صح وخلاص.

Post new comment

The content of this field is kept private and will not be shown publicly.
CAPTCHA
This question is for testing whether you are a human visitor and to prevent automated spam submissions.
two plus six equals
Solve this math question and enter the solution with digits. E.g. for "two plus four = ?" enter "6".
Delicious Bookmarks