linuxawy

Question = 2 ( B || !B )

Ideas.. I've seen people kill in the name of them... and die defending them. We are told to remember the idea, not the man. Because a man can fail. He can be caught, he can be killed and forgotten. But several years later... his idea can still change the world.
About me
انا أحمد.. لينوكساوى.. مكاوى.. دسوقى.. بلاك كات.. أنا كل دول، لكن انا فعلا ابقى مين؟ شاب مصرى اسكندرانى عنده 27 سنة.. بيحاول يكون انسان ليه لزمه.. بيحاول ما يكونش من اللى بيعيشوا ويموتوا من غير هدف، ولا من اللى بيعيشوا ويموتوا علشان هدف هما مش فاهمينه، ولا من اللى بيعيشوا ويموتوا علشان هدف فاهمينه لكن مش عارفين يوصلوله ازاى، ولا من اللى بيعرفوا كل ده ويفشلوا فى تحقيقه فى الاخر. باحاول يكون لى رأى فى كل حاجة فى الدنيا. وباحاول تكون ارائى منطقية على قد ما اقدر.



اتعلمت انى لما اقتنع اقتنع بفكرة مش بشخص.. علشان الشخص بيغلط.. ولما اكره اكره الفكرة علشان الشخص ممكن يغير رأيه.. ممكن تلاقوا أشخاص انا باتعامل معاهم عادى وفى نفس الوقت باعلن عدائى الشديد لافكارهم، مش معنى كده انى منافق لكن معنى كده ببساطة انى مستنى الوقت اللى حد مننا يغير رأيه.. مين عارف ممكن يكون قريب :)



طبعا أول حاجات الناس بتهتم تعرفها عنى هيه بيانات البطاقة ومثلث الجدل المصرى المعروف (الدين والسياسة والكورة).. زى ما قلت أنا أحمد المكاوى 27 سنة اسكندرية(asl :P) متزوج حديثا (مارس 2008) باشتغل لينوكس ادمين (linux admin)... وبالنسبة للكورة فانا اهلاوى غير متعصب خالص.. أهلاوى علشان لقيت كل الناس كده مش لأى سبب تانى.. غير متعصب لأن ما عنديش وقت اضيعه فى الفرجة على الكورة.. بالنسبة للدين انا مسلم باحاول اكون ملتزم على قد ما اقدر، ملتزم بكل الاراء الدينية الثابتة وباحاول ازود ثقافتى الدينية باستمرار.. مش من النوع المتعصب نهائيا بالعكس باحاول أكون منفتح مع الاخرين على قد ما ربنا يقدرنى من غير تهويل أو تهاون.


السياسة بأه ديه موال طويل.. مبدئيا انا مش عضو فى أى حزب أو اتجاه أو جماعة محظورة أو غير محظورة.. باكره الظلم ومؤمن بتساوى الفرص، باكره الغش والتزوير وباحتقر اللى يعملهم.. شايف ان فكرة الدولة العلمانية ديه فكرة عبثية ومؤمن تماما بالدولة الدينية اللى بتراعى جميع الاتجاهات، وشايف ان العلمانية فكرة بيضغطوا علينا بيها من برة علشان يلغوا ال 0.0000000001 الفاضلة من جذورنا وهويتنا.. هممم، تدينى يمينى ولا يسارى؟؟ مش فارقة كتير، ممكن تعتبرنى انسان ليه رأى وخلاص ومش لازم تحطه فى واحد من القوالب الموجودة. ممكن تعتبرنى واحد ممكن ينضم فى حزب وسط فى يوم من الايام لما يكون فيه أحزاب وسط (أو أحزاب أصلا.. معلش انا شايف ان اللى بيحصل دلوقتى تهريج مش عمل سياسى مع احترامى لكل الناس اللى فى الاحزاب)، أو ممكن تقول عليا اللى انت عايزه علشان مش فارقة كتير لكن أكييييييييد أنا مش مع الوضع الحالى بأى صورة من الصور.. حلو كده؟



عموما ممكن تلاقونى على الانترنت فى حتت تانية:

Email
Google Talk: linuxawy@gmail.com
MSN Messenger: linuxawy@eglug.org
Yahoo Messenger: linuxawy_eg
Egypt GNU/Linux User Group
Twitter
Facebook

my gpg key:
gpg --keyserver pgp.mit.edu --recv-keys 0xFE15D81D

note that my old key is revoked (0x179CB637)

Delicious Bookmarks